Ghiti, Stele e il grup di amîs a rivin te isule de Cone

I nestris amîs a rivin te isule de Cone, puest dulà che lis besteutis a son libaris di stâ inte nature cemût che a vuelin. Al sarès propit un grant relax se nol fos cualchidun che ju disturbe!

“Cuac cuac!” e vose une raze sustade che e somee che e scjampi di alc

“Mandi! Jo o soi Stele e lui al è Ghiti! Lôr a son i nestris amîs” si presente Stele

“Cuac! Par plasê judaitmi! Mi clami Bacanele e al è cualchidun che al continue a dâmi fastidi a mi e a chei altris uciei che a cirin di fâsi il nît ca te isule. Al sofle fuarton!

Lu clamin Folet Marin!” e dîs Becanele fastidiade

“Al sofle fuarton? Ma alore al à di vê polmons di açâl! Cemût podìno fermâlu?” al domande Ghiti a chei altris amîs

“Mi è vignude une idee!” e dîs Stele “O podaressin dâsi dongje ducj insiemi tignintsi la man, cussì cuant che il Folet Marin al soflarà par fâ i dispiets nol rivarà a movinus e al restarà cence flât!”

“Ce idee divertente! O fasarìn nô un scherç a lui, cussì al capirà cemût che si sintisi… ahah!” e dîs Bolp ridintse par cont so

Il grup di amîs e i uciei de isule de Cone si cjapin pe man e a spietin che il Folet Marin ur sofli intor. Il Folet Marin al sofle a sbreghebalon ma nol rive propit a fâ svolâ vie la compagnie, e ducj a tachin a ridi a plene panze.

“Uuuf! Ce strache, no je fâs plui! No stait a cjolimi vie!” al dîs rabiât il Folet Marin

“Nô no ti cjapìn in zîr, ma tu âs di prometi che no tu darâs plui fastidi aes besteutis de isule” al dîs alore Ghiti

“No sin contents di chel che tu âs fat, ma se tu imprometis di no fânus plui chescj bruts scherçs tu puedis restâ cun nô te isule a zuiâ” e zonte Becanele

“E va ben! O impromet che di vuê indenant no us darai plui fastidi se o zuiarìn insiemi!” al rispuint il Folet Marin

“O ai savût di un ucielut, che cualchidun al spiete il vuestri jutori a Udin. Lait, lait a judâlu!” e zonte Becanele

“Gracionis amîs! Passait a cjatânus cuant che o volês!” a disin ducj i uciei saludant Ghiti, Stele e chei altris

“Mandi mandi! Prossime destinazion: Udin!”

E vie ducj par une altre aventure.