Noaltris – Ghiti

Stele, une frute ninine e gaiarine e je lade a fâ une cjaminade in mont cui siei barbis. Oh, ce maravee! La magjie che dome il bosc al da, le incjante cussì tant che, par une disatenzion, si piert tra i arbui...

Il soreli al è daûr a lâ a mont, lis ombris si slungjin cidinis cidinis e a rivin a fâi pôre. Bot e sclop, di daûr des ramacis, si sint un rumôr fuart. Stele si plate daûr di un arbul e e tache a lumâ, cul cûr che al bat fuart.

Ma, di un sterp, al ven fûr dome un riç picinin e legri.

Passade la pôre, la frute si svicine e i dîs: “No savevi che i riçs a fossin bogns di ridi”. Il riç, un saltuç daûr di chel altri, i va dongje par fâsi cjarinâ: cui siei aseis le fâs riduçâ, e i dîs “Ghiti!”.

Stele, e je maraveade di sintî fevelâ une besteute cussì picinine e e pense che chel al sedi propit il so non, inalore i rispuint fasint bocje di ridi: “Mandi, Ghiti! Jo o ai non Stele!”.

Ce biel! Il riç al fevele par furlan come a cjase, e a scuele! Ghiti e ducj i siei amîs dal bosc a fevelin furlan. Cussì Stele e decît di imparâ plui peraulis par furlan, par tornâ biel prest a fevelâ cun Ghiti.

Mande il tô dissen

Mande la tô ricete

Contatinus!