Altri video di questa serie
Altris videos di cheste serie
Altri video di questa serie
Altris videos di cheste serie
Maman! La trasmission par fruts dute in lenghe furlane
In onde su Telefriuli (canâl 11) ogni vinars
Une produzion di ARLeF – Agjenzie Regjonâl pe Lenghe Furlane e di Telefriuli
Intune cjasute cun tancj colôrs a son a stâ Daria e il gjatut Vigji che a passin dopomisdîs tant divertents cjantant cjançons, zuiant, contant barzaletis e leìnt storiis. A ogni pontade a tuchin te puarte ospits simpatics, ognidun cuntune storie particolâr: cjantants, scritôrs, ilustradôrs, insegnants, mâcs, cjantautôrs, atôrs, comics, musiciscj, cogos e tancj altris. A inricjî ogni apontament a son tantis rubrichis: “A ogni frut il so librut”, dedicade ae leture di un libri ilustrât in lenghe furlane; il “Zûc”, cu lis ilustrazions di “Alc&Cè”, insert de “La Vite Catoliche”; “Master Cogo Furlan”, cu la preparazion di golosets facii di fâ; “99 Peraulis”, lis cjartis ilustradis par imparâ peraulis gnovis in plui lenghis; i “Mûts di dî” e il spazi dedicât ai videos mandâts dai fruts di cjase. Ae fin, pai adults, une videointerviste curte dal progjet “Cressi cun plui lenghis” par informâ e par sensibilizâ i gjenitôrs, i nonos e i educadôrs sui vantaçs dal plurilinguisim.
In cheste pontade (23). Manuela Rossi e va a cjatâ Daria par puartâ a tiermin une mission: fâi cambiâ idee sui insets che jê propit no ame. Manuela e je une professore naturaliste di siencis che e colabore ancje cu la Cjase des paveis di Bordan dulà che si interesse de part didatiche e dal arlevament e de cure dai animâi. La Cjase des paveis e je une struture che e ospite plui di 400 speciis di paveis origjinariis di tancj paîs dal mont: chê plui grande e je la falene cobre. I masclis des paveis a son colorâts par atirâ la atenzion des feminis che invezit a àn di jessi plui grandis par contignî i ûfs, e di colôr maron, par protezisi mimetizantsi cun facilitât. Manuela e insegne a Daria une lavorut di fâ par visâsi il cicli de vite des paveis. Ae fin di cheste gnove esperience, Daria no à plui pôre dai insets e Manuela i regale une biele teche entomologjiche. Dopo vê fat il zûc di Alc&Cè, imparade cualchi gnove peraule cun “99 Peraulis”, cjalât il video di “Babarut l’elefantut” e insegnât un gnûf mût di dî, Daria si rilasse intal tinel cun Vigji, il so gjatut, e i conte lis aventuris de zornade. In sieradure, pai gjenitôrs, e va in onde une videointerviste curte a Antonele Sorace: “Se a sostignî la lenghe minoritarie al è dome che un dai doi gjenitôrs, cemût si aial di compuartâsi?”.
Condutore e autore: Daria Miani
Regjie: Luca Fornasiero
Musiche: Flaviano Miani
Redazion e consulence linguistiche ARLeF: Priscilla De Agostini, Linda Picco, Miriam Pupini
Responsabil dal progjet pe ARLeF: William Cisilino
Coordenament pe ARLeF: Priscilla De Agostini
Sigle Maman!: vôs e peraulis di Daria Miani, musiche di Flaviano Miani, foto di Silvia Raber, animazion di Pierangelo Buttazzoni e Davide Nicolicchia
Logo Maman!: Calt Udin
Durade: 20 minûts cirche
Contats:
arlef@regione.fvg.it
maman@tvstar.com