Altri video di questa serie
Altris videos di cheste serie
Altri video di questa serie
Altris videos di cheste serie
Maman! La trasmission par fruts dute in lenghe furlane
In onde su Telefriuli (canâl 11) ogni vinars
Une produzion di ARLeF – Agjenzie Regjonâl pe Lenghe Furlane e di Telefriuli
Intune cjasute plene di colôrs a vivin Daria e il gjatut Vigji. Ogni dì e ven a cjatâju la lôr amie Chiara e ancje Siôr Timp, un personaç une vore stravagant: insiemi a passin dopodimisdîs une vore divertents là che a cjantin, a zuin, a contin barzaletis e a lein contis.
In cheste pontade: Carnevâl (5). Al è rivât Carnevâl, il periodi dai scherçs, dai mascaraments e de ligrie. Siôr Timp al conte di vê visitât lis vals furlanis e di vê viodût diviersis mascaris tipichis di carnevâl (cualchidune i à fat propit pôre!): i Tomats di Tarcint e di Nimis, lis mascaris di Circhinis intes Vals dal Nadison cun vistîts di pelice e di elare, i Blumari di Monfoscje. Daria invezit e à za fat a Chiara cualchi scherç divertent e e à tante voie di continuâ. A àn di viodisi par lâ a comprâ coriandui e sarpintinis: Daria e decît di no fâsi cjatâ in cjase e di travistîsi par disorientâ Chiara. La amie e rive di fat a cjase di Daria e no le cjate: e viôt tal zardin une siore cu la piruche bionde che i dîs che Daria e je lade fûr, alore Chiara si met a cirîle e e cjate un om che i sigure di no vêle viodude. E decît di tornâ viers cjase e intal zardin, dongje dal arbul di Maman!, e cjate une frute che e zuie: i domande se e à viodût une fantate cul vistît neri a balins rose, cui cjavei riçots… in chel moment Chiara si inacuarç che Daria e je devant di jê, trucade di frute: i à fat un scherç e si è travistide dutis trê lis voltis! Ma Chiara il scherç jal tornarà! E di fat, a mirinde, i puarte a Daria une biele fritule di carnevâl farside di sâl: cui che le fâs, che se spieti! Ma par zûc, mighe par svindic! Lis dôs amiis a cjantin “Sù frutins al è carnevâl” e ae fin de serade Vigji al scolte la conte di Daria.
Condutoris e autoris: Daria Miani e Chiara Donada
Cu la partecipazion di: Manuel Buttus
Responsabil di produzion pe ARLeF: William Cisilino
Coordenament gjenerâl: Vittorio Vella (Deltastudios)
Regjie: Luca Fornasiero
Musichis origjinâls: Flaviano Miani (musiche), Daria Miani (peraulis)
Animazion sigle: Pierangelo Buttazzoni e Davide Nicolicchia
Consulence linguistiche e otimizazion: Linda Picco e Elena Zanussi (Calt sas)
Durade: 20 minûts cirche
Contats:
arlef@regione.fvg.it
maman@tvstar.com