Altri video di questa serie
Altris videos di cheste serie
Altri video di questa serie
Altris videos di cheste serie
Maman! La trasmission par fruts dute in lenghe furlane
In onde su Telefriuli (canâl 11) ogni vinars
Une produzion di ARLeF – Agjenzie Regjonâl pe Lenghe Furlane e di Telefriuli
Intune cjasute plene di colôrs a vivin Daria e il gjatut Vigji. Ogni dì e ven a cjatâju la lôr amie Chiara e ancje Siôr Timp, un personaç une vore stravagant: insiemi a passin dopodimisdîs une vore divertents là che a cjantin, a zuin, a contin barzaletis e a lein contis.
In cheste pontade: Març matucel (8). Siôr Timp al conte che il mês di Març al à la nomee di jessi mataran parcè che un pôc al vai e un pôc al rît: ma ce puedial fâ, biât, cuant che a son in doi a comandâlu? Se l'Invier i ordene di mandâ ploie e aiar e di fâ colâ ducj i butui, lui al à di fâlu; se invezit e je la Vierte a ordenâ, lui al à di butâ rosis intai prâts, fâ scjampâ i nûi, clipî l'aiar e invoiâ i fruts a zuiâ tal viert. A mancjin dome 19 dîs ae Vierte e Siôr Timp al scomence a fâ gjinastiche par preparâsi ae gnove stagjon: il timp… al svole! Chiara e clame Daria dal zardin ma jê i dîs di lâ sù in cjase: e je dute indurmidide e no rive a sveâsi, forsit e sint il timp o, forsit, tant che i animâi, e spiete la Vierte par lâ fûr dal letarc. Ma la zornade e je tant biele e, prime che Març al cambi idee, e insist Chiara, bisugne lâ a zuiâ difûr, tal zardin. Daria ae fin e jes di cjase e e je contentone: e cjante “Març matucel” cu la amie, dopo a lein insiemi la storie di “GjatUt e la ploie” di Deborah Crapiz e Doriana Alessi (Ed. Kappa Vu). In serade Daria e conte a Vigji la sô zornade.
Condutoris e autoris: Daria Miani e Chiara Donada
Cu la partecipazion di: Manuel Buttus
Responsabil di produzion pe ARLeF: William Cisilino
Coordenament gjenerâl: Vittorio Vella (Deltastudios)
Regjie: Luca Fornasiero
Musichis origjinâls: Flaviano Miani (musiche), Daria Miani (peraulis)
Animazion sigle: Pierangelo Buttazzoni e Davide Nicolicchia
Consulence linguistiche e otimizazion: Linda Picco e Elena Zanussi (Calt sas)
Durade: 20 minûts cirche
Contats:
arlef@regione.fvg.it
maman@tvstar.com